|
Pointe Tosaithe inmholta:
Pointe tosaithe inmholta: Tigh Tábhairne “Marine Bar”
(S7 ar an léarscáil)
Táimid anois ag an bpointe rochtana is cóngaraí
d’fhoinse an tsrutháin neamhghnách seo, a bhí mar uisce
beatha dos na glúinte do-áirithe a chónaigh laistigh de
limistéir abhantrach Ghleann na Lice. Srutháin dá
leithéad seo a spreag Alfred Tennyson chun an dán
iontach sin “The Brook” a chumadh, leis na línte buana
sin “For men may come and men may go, but I go on
forever.”
Pointe tosaithe maith don siúlóid seo ná an tigh
tábhairne ceann tuí traidisiúnta ag Polla darbh ainm “An
Seanachaí”. Téir ó dheas agus cas ar chlé i dtreo an
Ghoirtín taobh leis an tigh nua-aimseartha leis an ndíon
le síor-fána atá suite taobh thiar de ghairdín clochrach.
Tá Aiteann, Driseacha agus Raithneach Mhór go fliúrseach
sna fála anseo, le corr Sceach Geal. Tugann an Cúfróg
Lawson forimeallach foithint ón ngaoth don bhforaois de
Ghiúis Sitka aibí agus de Phéine Contórtach atá ar
thaobh do láimhe chlé.
Tóg an forc ar dheis síos i dtreo Dhroichead na Faiche
agus chífidh tú plandáil óg triaileach de Chéadar an
Iarthair (Thuja Plilata) ar thaobh do láimhe deise. Tá
foraoiseacha de Ghiúis Sitka ar dhá thaobh an bhóthair
níos faide ar aghaidh agus tá idir fraoch Calluna agus
fraoch Erica go fliúrseach sa bhfál, ag dul siar go dtí
am nuair a bhí an ceantar seo ar fad clúdaithe le Móin.
Nuair atá tú ag Droichead na Faiche tá tú ag an bpointe
is gaire d’fhoinse Abhainn na Lice anois, foinse atá
leath mhíle in aghaidh srutha. Is féidir samplaí aibí de
Ghiúis Sitka a fheiscint in aice leis an droichead. Tá
saothrú den Saileachán Francach, atá suntasach i míonna
Iúil agus Lúnasa, le fáil suas an bhóthar, áit a bhfuil
treascairt glan déanta.
Tá an choillteoireacht an-throm san áit seo agus ag barr
an Scardáin feictear Giúis Sitka agus Péine Contórtach
don chuid is mó. Má fhéachann tú ar chlé ag an bpointe
seo tá an pointe is airde 213 méadar os cionn leibhéal
na farraige agus sileann sé seo isteach i bhfoinse na
Lice. Is anseo freisin atá an t-aon radharc amháin den
bhfarraige ó dheas a gheobhaidh tú in aon cheann de
Shiúlóidí na Lice.
Cas ar dheis síos Móin na mBráthar tar éis gabháil ar
bhóthar dhíreach atá neamhghnách. Seachas roinnt cluanta
chnoic, tiocfaidh tú trasna ar fhoraois i ngach céim den
bhfás.
Cas ar dheis ag Crosaire Uí Ailín agus nuair a
shroiceann tú barr an chnoic ag An Chúil Rua tá radharc
iontach lánléargais ar na Comaraigh soir uait agus ar
Ghleann na Lice ó thuaidh agus siar uait. Seo an áit is
fearr chun do mhacnamh a dhéanamh ar chumhacht iontach
an nádúir, nuair is féidir leis an tsruthán bheag seo
gleann chomh éachtach a shnoí de réir mar a théann sé
chun fuinnimh.
Tá tú ar ais ar an N25 ag Crosaire an Chúil Rua. Cas ar
dheis agus trasnóidh tú an Lice ag Droichead Pholla.
Tabharfaidh tú faoi deara cé chomh neartmhar is atá an
abhainn anois san achar ghearr idir an dá dhroichead ar
an siúlóid seo.
Tá an Marine Bar suas an bhóthar. Tagann an t-ainm ó na
saighdiúirí cabhlaigh a bhíodh ag traenáil in Eochaill
sular chuadar go dtí an Fhrainc le linn an chéad chogadh
domhanda.
Cas ar dheis chun siúlóid uimhir a 7 a chríochnú agus
stop ar feadh tamaillín ag barr an chnoic chun féachaint
siar thar an cheantar atá díreach siúlta agat..
 |
